Mga opisyales para sa tuig 2008: 

Presidente – Emmy Masola
Bise-Presidente – Linda Arnaez-Lee
Sekretaria – Anne Naig
Tresorera – Jigsz Nietes-Satapornvanit
Kabulig kang Tresorera – Acay Flores
Local Coordinator – Acay Flores
Liaison Officer – Manie Magbanua, Jr.

Advisor/Consultant - Consoling

 

Gin-istoryahan man ang mga possible nga imbitarun kag himuon nga miyembro kang Board of Directors para marehistro ang DK bilang organisasyon.

 

Ginsugtan kang tanan nga ang monthly meeting pagahiwatun kada last Friday of the month.

 

Ang masunod amo ang schedule kang workshop parte sa pagresearch kag pagsulat kang atun maragtas ukon history. Ang workshop pagahiwatun sa 6-8 June sa Casa Madrangca. Kung sin-o interesado mag-intra palihog lang contact kay Ms. Acay Felicia Flores (Local Coordinator, Dungug Kinaray-a) sa cp # 0915-702-8476 ukon mag email sa dungug@yahoo.com. Libre ang pag-intra sa workshop gani gina-imbitar ang tanan nga interesado nga magpartisipar agud mapabaskug pa gid ang inyo nga skills sa pagsulat.

 

Una nga adlaw, June 6

 

3:00 – 5:00 sa hapon: Pag-abot kag registration

 

5:00 – 5: 30: Opening Program kag Orientation parte sa Dungug Kinaray-a kag Workshop Proceedings

 

5:30 - 6: 30: Panyapun

 

6:30 – 8:30: Istoryahanay kag Fellowship

 

Ikarwa nga adlaw, June 7

 

7:00 – 8:00: Pamahaw

 

8:00 – 8:30: Lecture 1: Methods of Historical Research

(Aida M. Ricarze, PhD, VP for Academics, Saint Anthony’s College)

 

8:30 – 10:00: WORKSHOP 1. Simulated data gathering, etc.

 

10:00 – 10: 20: Lecture 2. Pagsulat kag pag-Organize kang Research Data

 

10:20 – 12:00: WORKSHOP 2. Writing and Review of Research Data

 

12:00 -1: 00: Igma

 

1: 00 – 1: 30: Lecture 3. Creative Writing and Historical Research

(Prof. John Iremil Teodoro, Coordinator, Fray Luis de Leon Writing Institute,

University of San Agustin)

 

1:30 – 3:00: WORKSHOP 3. Rewriting, Review, Critiquing of Outputs

 

3:00 – 3:15: Pahuway

 

3:15 – 6:00: Padayun kang Workshop

 

6:00 – 7:00: Panyapun

 

 

Ikatlo nga adlaw, June 8

 

7: 00 – 8: 00: Pamahaw

 

8: 00 – 9: 30: WORKSHOP. Review, Critiquing, Finalization of Outputs

 

9: 30 – 9: 45: Merienda

 

9: 45 – 12:00: WORKSHOP. Review, Critiquing, Finalization of Outputs

 

12:00 – 1:00: Igma

 

1:00 – 3:00: WORKSHOP 4. Finalization of Outputs

 

3:00 – 3:15: Pahuway

 

3:15 – 4:00: Closing Ceremonies kag panagtag certificates sa mga nag-intra

 

Ang workshop nga dya ginadara kaninyo kang Dungug Kinaray-a, kaimaw man kang Paranublium-Antique kag Kinaray-a.com.

 

GINAPAMAAN sa tanan!

Ang FINAL DATE kang Workshop kang Dungug Kinaray-a amo ang Hunyo 6-8, 2008. Ang interesado magpasakup, magpalista lang sa forum sa Kinaray-a.com ukon mag email sa dungug@yahoo.comThis e-mail address is being protected from spam bots, you need JavaScript enabled to view it ukon direkta nga makipag-angut kay Nang Acay Flores (Ma.Felicia Flores) sa Paranubliun Antique.

Maximum of 15 participants. Palihog dara kang inyo sinulatan bisan sara lang.

Ang titulo kang workshop nga dya amo ang: “Pagpanday kang Maragtasun nga Pagtukib kag Mabugnaun nga Pagsulat” (Historical Research and Creative Writing Workshop). Himuun dya ang workshop bilang suporta sa mga manunulat agud mahanas pa gid ang kinaadman nanda sa pagsulat.

Ang magtudlo kag maghiwat kang workshop amo sanday Dr. Ricarze, John Iremil Teodoro kag Acay Felicia Flores.

Libre dya kag imbitado ang tanan nga luyag magpasakup. Pero mapasalamat man kami kung may matugro man kamo nga donasyon.

Palihog lang bantayan ang sunod nga mga anunsyo ilabi na gid sa lugar kang workshop.

Duro gid nga salamat sa pagbuylog!

Updates will be delayed for the time being. Doesn’t have the proper tools and resources so bear with us. Thank you.

DUNGUG KINARAY-A
PAINDIS-INDIS SA PAGSUGIDANUN 2008
MGA GIYA KAG PAGSURUNDAN

Tema:  “MGA SUGIDANUN KANG TIYEMPO HAPON”

Kabilugan nga mga Giya

1. And paindis-indis bukas para sa tanan luwas sa mga miyembro kang
 Dungug Kinaray-a.

2. Ang piyesa (entry) kinahanglan isulat kag ipasundayag sa Kinaray-a. 

3. Ang piyesa kinahanglan orihinal nga obra kang manunulat kag wara pa
 nabantala (unpublished), sa papel ukon sa internet, ukon ginhuwad sa
 sinulatan kang iba.  Indi pagbatunon ang piyesa nga ginbadbad (translate)
 sa Kinaray-a halin sa iba nga polong ukon linggwahe.

4. Ang tema ukon topiko kang piyesa kinahanglan nahanungud sa mga
 hitabo ukon pangabuhi kang tiyempo Hapon kag Ikarwa nga Giyera Pangkalibutan
 (mga tuig 1941-1945).  Ang piyesa kinahanglan halin sa matuod nga mga
 hitabo nga personal nga inagyan, nabatian, ukon pinanilagan kang
 manunulat.

5. Kun ang sugidanun natipon paagi sa pag-istorya ukon pagpamangkot sa
 iban nga tawo, kinahanglan isulat ang ngaran, edad, obra, kag lugar nga
 ginapuy-an kang gin-istorya ukon ginpamangkutan.  Ang dya nga mga
 impormasyon kinahanglan isulat sa urihi nga panid kang piyesa bilang
 proweba sa pagkamatuod kang sugidanun nga ginsulat.  

6. Indi pagbatunon ang piyesa nga nakaagi daug sa iba nga paindis-indis
 antes magsamput ang tungang gabii kang Hulyo 31, 2008.

7. Ang kada manunulat makapasulod kang isara (1) lang nga piyesa.

8. Ang piyesa kinahanglan indi magsobra sa baynte (20) ka panid nga
 pinaagi sa kompyuter, doble ang lat-ang, nabalhag sa papel nga nagasukol
 kang 8.5×11 purgada, kag may tagsangka purgada ang distansya sa kada
 binit.  Ang agi kang sulat sa kompyuter amo ang Book Antiqua, kag ang
 kabahulon ka letra numero dose (12).

9. Indi pagbatunon ang piyesa nga may ngaran,  ayo, alyas, ukon ano man
 nga paratandaan nga nagapakilala sa manunulat.

10. Ang piyesa kinahanglan ipadara paagi sa email paagto sa
  dungug@yahoo.com antes magsamput ang tungang gabii kang Hulyo 31, 2008.
  Magabaton kang sabat nga email ang manunulat bilang pagpamatuod
 (acknowledgement) nga nabaton ang piyesa.

11. Ang piyesa kinahanglan ipadara bilang Microsoft Word document file
 kag kinahanglan ipadara bilang sakut imaw ang mga masunod:
a. bio-data ukon résumé kang manunulat
b. nahuman kag pirmado nga kopya kang  Opisyal nga Pormas kang
 Pagpasakup (Official Entry Form).  Indi pagbatunon ang piyesa kun ang Opisyal
 nga Pormas kang Pagpasakup wara ti pirma kang manunulat.

12. Kun menor sa edad nga tagpasakup,  ang Opisyal nga Pormas kang
 Pagpasakup kinahanglan pirmado kang ginikanan ukon legal nga manogbantay
 kang manunulat.  Ang pormas libre kag sarang pangayuun paagi sa pag-email
 sa dungug@yahoo.com.  Ang bio-data ukon résumé kang manunulat wara
 nagakinahanglan kang pormas kag sarang dya mahimo sa bisan ano nga paagi. 

13. Ang piyesa kinahanglan magtuman kang patakaran kang gobyerno parti
 sa nabalhag nga mga butang (printed matters).

14. Ang manunulat dapat magtuman kang laye nahanungod sa R.A. No. 8293
 ukon Laye sa Kinaaram nga Propiedad (Intellectual Property Law).  Sa
 pagpasulod kang piyesa, ang manunulat nagapamatuod nga tana ang nagsulat
 kag nagapanag-iya kang piyesa.   Kun sa urihi masapwan nga nagbutig ang
 manunulat, pagabawiun ang padya kun nagdaug.  Ang manunulat magabayad
 man kang mga damyos, binaydan, kag ginastos kang Dungug Kinaray-a sa
 pagsabat natungud sa paglapas ukon pagpamatok kang laye.

15. Ang tanan nga nagapasakup, nagabaton kag nagasugot sa tanan nga mga
 giya kag pagsurundan nahanungud sa dya nga paindis-indis.

Mga Giya sa Paghukom
16. Ang piyesa pagahukuman paagi sa:
a.  Pagsulat (50%)
b.  Paglubad (interpretation) (50%)

17. Ang Pagsulat bukas halin sa Pebrero 1, 2008 hasta sa Hulyo 31,
 2008.  Ang Paglubad pagahiwatun sa Nobyembre 30, 2008 sa lugar nga
 pagabantala sa nagakaigo nga tion.  

18. Ang mga piyesa nga nakabaton kang pinakataas nga marka sa Pagsulat
 amo ang sarang makaabanse sa Paglubad.  Ang Pundok kang Manoghusgar
 (Board of Judges) ang magadesisyon kun ano nga mga piyesa kag pira ka
 piyesa ang sarang makaabanse sa paglubad.  

19. Ang manunulat kang napilian nga mga piyesa nagasaylo kang andang
 pagpanag-iya kang mga piyesa sa Dungug Kinaray-a nga wara ti kinahanglan
 nga bayad, luwas sa padya nga anda nabaton.  Dya nga mga piyesa mangin
 propeded kang Dungug Kinaray-a kag sarang na gamitun sa nasari-sari kag
 nagakaigo nga mga paagi, buruhatun, kag katuyuan. 

20. Ang manunulat kang napilian nga mga piyesa may katungdanan sa
 pagpangita, pagpili, kag paghanas kang manoglubad (interpreter). 

21. Ang Pagsulat pagahukman paagi sa mga masunod nga surundan:
a.  Maathag nga pagpabutyag kang panghunahuna (35%)
b.  Orihinal kag kinaugalingon nga ginsulat kag angut sa tema (35%)
c.  Kabilugan nga arte kang Pagsulat (30%)

22. Ang Paglubad pagahukuman paagi sa mga masunod nga surundan:
a.  Limug: Ang manoglubad kinahanglan magpakita kang abilidad sa bilog
 nga panglimug, tuno, puntos kag kalidad nga panghambal nga nagasanto sa
 sinulatan, maathag, mapino nga pagkambyo kang limug ukon tono kag
 tayuyon ang panghambal. (40%)
b.  Baratyagun: Ang manoglubad kinahanglan magpakita kang abilidad sa
 pagbaylo kang anang baratyagon sa kalipay-kadlaw, sa kasubo-hibi,
 kaugot-kusmod, ukon kasakit-kurisung, suno sa sinulatan kag makatandog sa
 baratyagun kang nagapamati kag nagaturuk (40%).
c.  Saulado: Kinahanglan saulado kang manoglubad ang piyesa para
 tayuyon ang pagsugidanun. (20%) 

23. Ang kada Paglubad ginalimitahan sa diyes (10) hasta sa kinse (15)
 minutos.  Kun maglapaw sa termino may bagting nga mabatian.  Ang
 magkabos sa diyes (10) minutos ukon maglapaw sa kinse (15) minutos,
 pagabuhinan kang sangka punto (1 point) sa kada minuto nga nagkabos ukon
 naglapaw.

24. Ginatugutan ang paggamit kang kostyum, mik-ap, praps, mga huni, kag
 musika kun makabulig dya sa pagpanami pa gid kang Paglubad.

25. Ang pasunod kang Paglubad ipaagi sa gabutay kang numero antes ang
 pagpasundayag.

26. Ang Pundok kang Manoghusgar may katungdanan sa pagdesisyon nga indi
 magtugro kang padya kun, sa ana paghukom kag kaaram, wara ti piyesa
 ukon manoglubad nga angay padag-un.

27. Ang Dungug Kinaray-a ang may katungudanan sa pagpili kang miyembro
 ka Pundok kang Manoghusgar.  

28. Wara ti mapungko nga manoghusga kun may kaangtanan sa pagtudlo kag
 paghanas kang manoglubad.

29. Ang makabaton kang pinakataas nga puntos sa Pagsulat magadaug
 bilang “Kampyon nga Manunulat.”

30. Ang makabaton kang pinakataas nga puntos sa Paglubad magadaug
 bilang “Kampyon nga Manogsugidanun.” 

31. Ingkaso nga may patas (tie) sa (a) kabilugan nga marka kang mga
 piyesa, ukon sa (b) marka kang mga manoglubad, ang Puno nga Manoghusgar
 (Chief Judge) sa Pagsulat kag Paglubad ang magapili kang magadaug.

32. Ang desisyon ka Pundok kang Manoghusgar sarado kag indi pwede
 maislan.

33. Ang mga ngaran kang manunulat kang napilian nga mga piyesa kag
 miyembro ka Pundok kang Manoghusgar sa Pagsulat pagabantala  sa Agosto 15,
 2008.  Ang mga ngaran kang miyembro ka Pundok kang Manoghusgar sa
 Paglubad pagabantala sa Nobyembre 30, 2008

Ang Mga Padya
34. Ang tatlo ka piyesa nga makabaton kang pinakataas nga marka
 (kabilugan nga marka sa Pagsulat kag Paglubad) ang piliun nga nagdaug, kag
 magabaton kang mga masunod nga padya, sa Pilipinas nga piso (Php):
a. Primero nga lugar - Php15,000 kag medalya
b. Segunda nga lugar - Php10,000 kag medalya
c. Tresera nga lugar – Php7,000 kag medalya

35. Ang nabilin sa mga piyesa nga napilian magabaton kang Php3,000 kada
 piyesa.

36. Ang tanan nga napilian nga mga piyesa makadawat kang Sertipiko sa
 Pagpasakup (Certificate of Participation) sa paindis-indis.

Mayad nga adlaw mga kasimanwa!

Pagkatapos kang madinarag-un kag masadya nga “Sugidanun 2007” magahiwat
 ruman ang Dungug Kinaray-a kang sangka paindis-indis sa Pagsulat kag
 Paglubad sa kadya nga tuig 2008. 

Ang Pagsulat nga bahin magaumpisa sa Pebrero 1 kag magatakup sa Hulyo
 31, 2008 nga may tema “Mga Sugidanun kang Tiyempo Hapon.”  Dya
 nahanungod sa matuod nga mga hitabo, ukon pangabuhi kang tiyempo Hapon kag
 Ikarwa nga Giyera Pangkalibutan (mga tuig 1941-1945).  Ang piyesa
 kinahanglan halin sa matuod nga mga hitabo nga personal nga inagyan, nabatian,
 ukon pinanilagan kang manunulat.

Ang mga piyesa nga makabaton kang pinakataas nga marka sa Pagsulat amo
 ang sarang makaabanse sa Paglubad (Interpretation).  Ang Pundok kang
 Manoghusgar (Board of Judges) ang magadesisyon kun ano nga mga piyesa kag
 pira ka piyesa ang sarang makaabanse sa Paglubad.

Ang makabaton kang pinakataas nga marka sa Pagsulat magadaug bilang
 “Kampyon nga Manunulat.”

Ang makabaton kang pinakataas nga marka sa Paglubad magadaug bilang
 “Kampyon nga Manogsugidanun.” 

Ang tatlo ka piyesa nga makabaton kang pinakataas nga marka (kabilugan
 nga marka sa Pagsulat kag Paglubad) ang piliun nga nagdaug, kag
 magabaton kang mga masunod nga padya, sa Pilipinas nga piso (Php):
a.	Primero nga lugar - Php15,000 kag medalya
b.	Segunda nga lugar - Php10,000 kag medalya
c.	Tresera nga lugar – Php7,000 kag medalya

Ang nabilin sa mga piyesa nga napilian magabaton kang Php3,000 kada
 piyesa.  Ang tanan nga napilian nga mga piyesa makadawat kang Sertipiko sa
 Pagpasakup (Certificate of Participation).
Para sa dugang nga impormasyon, palihog basa kang nasakut nga “Mga Giya
 kag Pagsurundan.”  Kun may mga pamangkutanun ukon inogpaathag kamo,
 palihog lang post rugya ukon email sa dungug@yahoo.com.  Ginakalipay
 namun nga masabat ang inyo mga pamangkutanun.

Kag bilang suporta sa atun mga manunulat agud mahanas pa gid ang
 kinaadman nanda sa pagsulat, magahiwat ang Dungug Kinaray-a sa bulan kang
 Mayo 2008 kang “Pagpanday kang Maragtasun nga Pagtukib kag Mabugnaun nga
 Pagsulat” (Historical Research and Creative Writing Workshop).  Libre
 dya kag imbitado ang tanan nga luyag magpasakup.

Duro gid nga salamat sa inyo nga pagbuylog.

Mimi Nietes Salazar
Emmy Masola
Acay Felicia Flores kag ang anang mga imaw
Abic Nietes Tejares

Jomeille Grace Sedano (1st prize)
Nerie Arnaez-Bae (2nd prize)
Antiqueno Foundation International,Inc. (3rd prize)
Mark Anthony Mabaquiao (4th/consolation prize)
bookoto.com (Julie Marfil Kelly & Sheryl Ebon Martinez) - consolation prizes
Richie D. Pagunsan
Linda C. Arnaez-Lee
Brient Francois Alojado
Marzy Serdena
Dr. Jeong Mok Park
Merts Altares
Mark Anthony Mabaquio
Antiqueno foundation international,inc.
Milagros Geremia Lachica
Key & Jigsz

Ang hublag nga Dungug Kinaray-a naghiwat kang “Sugidanon 2007″, sangka pa-indis indis sa pagsulat kag pag-arte, nga nag-umpisa kang ika-15 kang Setyembre 2007 kag nagtapos kang ika-28 kang Disyembre 2007, kung sa diin ginlubad ang mga pyesa nga nakabaton kang mataas nga marka kang ika-24 kang Nobyembre. Ang Paglubad ginhiwat sa Plaza kang San Jose, Antique kang Byernes, ika-28 kang Disyembre 2007.

Ang mga pyesa nga nakabaton kang pinakataas nga marka (kabilugan nga marka sa Pagsulat kag Paglubad) kag ginpremyohan kang kuarta kag Sertipiko sa Pagsakup amo ang mga masunod:

1st: Hari kang Counterstrike, ginsulat ni Heidebert Paul Arnaez Otayde kang Morales St., Sibalom (Ginlubad ni Crisben Pagunsan)

2nd: Baruto, ginsulat ni Ma. Riza Arevalo Naig kang Aras-arasan, Tobias Fornier (Ginlubad ni Rose Mae Martinez)

3rd: Sa Kasisidnun, ginsulat ni Roselyn Arnaez Abuela kang Pantao, Sibalom (Ginlubad ni Julian Ray Abuela)

4th: Si Rodelo ang Bata nga Nagbulig Tapna kang Dengue, ginsulat ni Teonisto Salcedo Naig kang Poblacion Sur, Tobias Fornier (Ginlubad ni Ariel Saraza)

Si Julian Ray Abuela nga naglubad kang pyesa nga “Sa Kasisidnun” amo ang nagdaug bilang Kampyon nga Manogsugidanon.

Ang mga wara napilian nga mga pyesa nakabaton man kang regalo bilang pasalamat sa andang pagpasakop.

Ang Pundok kang Manoghusgar amo sanday Alex de los Santos (Pagsulat kag Paglubad), Bernie Salcedo (Paglubad), Beverly Asenjo (Pagsulat kag Paglubad), Felicia Flores (Pagsulat kag Paglubad), Glenn Mas (Paglubad), John Iremil Teodoro (Pagsulat) kag Ma. Milagros G. Lachica (Pagsulat)

Ang Dungug Kinaray-a nagapasalamat sa tanan nga mga nagbuylog sa amo dya nga hirikuton, ilabi na gid ang mga nagsumitir kang andang sinulatan kag ang mga nag-amot kang oras, talento kag kuarta agud mangin- posible ang paghiwat kang amo dya nga pa-indis-indis. Ginalauman kang hublag nga dya nga sa sunod nga mga tinuig mas duro pa gid ang makig-ambit para padayun natun nga ma-lab-ot ang atun misyun nga mangin-pag-un ang pag-gamit kang Kinaray-a, bisan diin man kita nga lugar sa kalibutan.

Panginbulahan sa tanan nga mga nagdaug kag kabay nga mas duro ang mag-intra sa sunod tuig kag makabatyag kang kakunyag sa amo dya nga hublag.

Ang hublag nga dya ginapangunahan kang Dungug Kinaray-a sa bulig kang Kinaray-a.com, Paranubliun Antique kag Antiqueno Foundation International, Inc. Sa dugang nga mga detalye palihog lang bisita sa http://dungug.freehostia.com.

Handurawan (Vision):

Mapasanyog ang paggamit kang kinaray-a sa atun pagsugidanun, pagsulat, pagtuon, pagdumara kang negosyo kag gobyerno kag sa iba pa nga bahin kang atun pangabuhi.

Misyon (Mission) :

Ma-preserba kag ma-tib-ong ang Kinaray-a sa patag kang pagsulat kag pag-arte